Неймар да Силва 2 февраль куни ўғлининг «Сантос»дан Каталония жамоасига ўтишида содир этилган молиявий фирибгарлик билан боғлиқ суд жараёнида кўрсатма бериш вақтида унинг ўғли фаолиятини каталонияликлар сафида якунлашга мажбур эмаслигини айтиб ўтди.

Бундан ташқари, у бир жамоа томонидан Неймарни «Барселона»дан трансфер қилиш учун унинг шартномасида белгилаб қўйилган 190 миллион евро миқдорида маблағ таклиф этилганини билдирган.

Бундан олдинроқ, Неймарга «Реал», «ПСЖ» ва «Манчестер Юнайтед» каби клублардан қизиқиш мавжудлиги хабар қилинганди.

Шунингдек, Испаниядаги маҳаллий нашрларда «Реал» президенти Флорентино Перес Неймарни ўз жамоасида кўришни истаётгани, уни таркибга жалб этиб, унга йилига 35 млн евродан иборат маош тўлашга розилиги ҳақида хабарлар тарқалганди. У шунингдек, бу трансфер амалга ошса, футболчига 30 млн евро миқдоридаги мукофот бериш ниятида экани айтилганди.