Нукус тиббиёт коллежида бўлиб ўтган тадбир буюк мутафаккир, ғазал мулкининг султони Алишер Навоий таваллудининг 575 йиллигига бағишланди.

ЎзА хабарида келтирилишича, “Шеърият мулкининг султони” деб номланган адабий кечада ёзувчи-шоирлар, адабиётшунос олимлар Алишер Навоий асарларининг қорақалпоқ адабиётига таъсири, шоир қолдирган бой адабий мероснинг бугунги ёшлар тарбиясидаги аҳамияти ҳақида сўз юритилди. Коллеж ўқувчилари шоир ғазаллари ва рубоийларидан ўқиди, достонларидан саҳна кўринишлари намойиш этди.

– Коллежимизда Алишер Навоийнинг ҳаёти ва ижодига бағишланган иншо ва тасвирий санъат танловлари ўтказилди, – дейди Нукус тиббиёт коллежининг ўзбек тили ва адабиёти ўқитувчиси Райҳон Мадаминова. – Бунда иқтидорли болалар буюк шоир асарларидан олган таассуротларини сўзлаб берди.

Тадбир Навоий шеъриятига бағишланган мушоира билан давом этди. Адабий кеча якунида иншо ва тасвирий санъат танлови ғолиблари тақдирланди.