Ўзбекистон ҳукумати 2016 йилнинг иккинчи ярмидан Марказий Осиёни Россия ва Хитой билан боғлайдиган автокоридор қурилишини тугаллаш учун Осиё тараққиёт банки(ОТБ)нинг умумий қиймати 405 миллион долларлик бир неча траншдан иборат кредит маблағларини қабул қилиб олишни бошлайди. Бу ҳақда Sputnik агентлиги Молия вазирлиги қошидаги Республика йўл жамғармаси вакилига таяниб маълум қилди.

ОТБ маблағлари мазкур лойиҳа доирасида 2018 йил охирига қадар учта транш кўринишида ажратилади.

“Лойиҳани ҳужжатлаштириш ишлари якуний босқичда, мазкур пакет яқин уч йил ичидаги ОТБ ва Ўзбекистон молиявий ҳамкорлик дастурига киритилган”, - дея ойдинлик киритди жамғарма вакили Тошкентдаги логистика масалаларига бағишланган конференция жараёнида.

Биринчи 2 транш 2011-2012 йилларда ажратилган бўлиб, мамлакат шарқидаги А-373 йўлини қайта қуришга сарфланган эди.

Ҳозирги вақтга қадар Ўзбекистонда миллий автомагистрал қурилишига ОТБ кредитлари ҳисобидан 1,1 миллиард доллар сарфланди. Маблағлар А-373 магистралининг “Тошкент – Андижон” бўлаги ва А-380 магистралининг “Ғузор – Бухоро – Нукус – Бейнау” йўлларини таъмирлаш ва кенгайтиришга сарфланган.