OpenSignal компанияси 4G-интернет тезлиги бўйича жаҳон давлатлари рейтингини эълон қилди. Сингапур энг тез 4G-интернетга эга давлат сифатида мазкур рўйхатнинг биринчи поғонасидан ўрин олди. Ушбу мамлакатда LTE-тармоғи тезлиги 37 Мбит/с ни ташкил этди.

Янги Зелландия иккинчи (29 Мбит/с), Венгрия учинчи (28 Мбит/с) ўринни банд этди. 

LTE-тармоғи қамрови бўйича эса Жанубий Корея рейтингда етакчилик қилди – 97 фоиз. Гонгконг 86 фоизлик натижа билан иккинчи поғонани банд этди. Тадқиқотчиларнинг қайд этишларича, юқори натижалар кичик, аммо аҳолиси зич давлатларда кузатилган.

OpenSignal таҳлилчилари маълумотларни уларнинг мобил иловаси ўрнатилган юз минглаб смартфонлар асосида тўплашди. Бунда фойдаланувчи маҳаллий операторнинг 4G-тармоғига уланиши талаб этилади.