Apple компанияси 2015 йилда 12 млн дона "ақлли" соат сотиб, йил натижаларига кўра ушбу бозорнинг етакчисига айланди. Бу кўрсаткич бозорнинг ушбу сегментидаги барча сотилган "ақлли" соатларнинг учдан икки қисмини ташкил қилади, деб хабар бермоқда Canalys таҳлилий агентлиги.

Бу борада 2-ўринни Gear 2 соати дизайнини яхшилаган Samsung компанияси, 3-ўринни Pebble, 4-ўринни Huawei эгаллади. Huawei компанияси Android Wear операцион тизимида ишловчи қурилмаларни сотувчи етакчи OEM (ўз бренди остида бошқа компанияларнинг маҳсулотини сотувчи) компания бўлди.

2015 йилда ишлаб чиқарувчилар 37 млн дан кўпроқ фитнес-билакузуклар сотганлар. Бу борада Fitbit компанияси етакчи бўлган. Хитойнинг Xiaomi компанияси 2-ўринни эгаллаган. Компания 2015 йил давомида 12 млн та Mi Band билакузугидан сотган.

Таҳлилчилар тақиб юриладиган қурилмалар умумий бозорининг 60 фоизлик ўсишини қайд қилдилар. Бундай юқори кўрсаткични биринчи набатда Fitbit, Apple ва Garmin қурилмаларининг янги йилдаги савдоси таъминлаган.