"Лестер" жамоаси мураббийи Клаудио Раньери ўз бошқарувидаги жамоанинг мавсум чемпионлиги учун курашдаги имкониятлари ҳақида фикр билдирди.

"Мен айтишни хоҳлайманки, "Ҳа, биз буни уддалай оламиз". Тўғри, мен Обама эмасман. Яхшиси мавҳумликни давом эттирмай қўя қолай.

Албатта, биз турнир арафасида аутсайдерлардан бири сифатида қаралаётгандик. Ҳозир ҳам ўзимизни кучлилар сифатида кўрмаймиз. Агар гранд жамоалар ўйинларини кучайтиришса, бизни яна енга бошлашади. Улар ўз ўйинларини топиб олишса, биз янада кўпроқ чопишга мажбур бўламиз.

Ҳамма ўзини босиб олсин. Мухлислар истаганча орзу қилишлари мумкин, аммо биз ердан оёғимизни узмаслигимиз, ҳаволаниб кетмаслигимиз керак. Агар, мавсум якунида биз кучли тўртликдаги ўрнимизни сақлаб қола олсак ва ЕЧЛга йўлланмани қўлга киритсак, буни ақл бовар қилмас натижа сифатида қабул қилса бўлади.

Мавсум арафасида мен бу йигитларга ишонч билдирдим ва уларни ҳамиша қўллаб-қувватлаб келдим. Мен уларга ҳеч қачон ўтказиб юборилган голлар учун айб юкламаганман. Мен уларга "Гол ўтказиб юбординглар, бунга айтганимни бажармаганинглар сабаб бўлди" демаганман. "Окей. Биз бу вазиятни қайта кўриб чиқамиз ва кейинги сафар яхшироқ ҳаракат қиламиз", дейман.

Мен одамларим ақлли бўлишини истайман. Агар сизда ақлли ёрдамчилар бўлса, ўйин сифати янада яхшиланади. Сизда фантастик даражадаги кучли футболчилар бўлиши мумкин, лекин унда ақл ҳам бўлмаса, барчадан яхшироқ бўла олмайсиз. Менда эса жуда ақлли футболчилар бор", дейди Раньери.

"Лестер" айни вақтда АПЛнинг 25 тури арафасида турнир жадвалида 50 очко тўплаган ҳолда биринчи ўринни эгаллаб турибди. "Тулкилар" эртага жадвалда ўзини таъқиб этиб келаётган "Манчестер Сити"га қарши майдонга чиқади.

Эслатиб ўтамиз, «Yes We Can» (Ҳа, биз буни уддалай оламиз) - will.i.am реперининг сингли ҳисобланади. Бу сўзлардан Барак Обама 2008 йилда ўзининг сайловолди кампаниясида шиор сифатида фойдаланган ва ғолиб бўлганди.