Сурия ташқи ишлар вазири Валид Муаллим Дамашқнинг таклифисиз Сурияда қуруқликдаги операцияларда иштирок этадиган хорижий ҳарбийлар "ўз уйларига ёғоч тобутларда" қайтишларига ваъда бермоқда. Муаллим бу ҳақда 6 февралда бўлиб ўтган матбуот-анжуманида айтиб ўтди, деб хабар бермоқда Associated Press ахборот агентлиги.

Муаллим Саудия Арабистони ортидан Сурияга ИШИД билан курашиш учун қўшинларини олиб киришга тайёрлигини билдирган Баҳрайнга шу тариқа жавоб берди. 

"Сурия ҳукуматининг розилигисиз Сурияга қуруқликдан ҳар қандай кириб бориш мамлакатнинг ҳар бир фуқароси қарши туриши керак бўлган тажовуз ҳаракати деб қабул қилинади. Менга буни айтиш аянчли, бироқ улар (хорижий ҳарбийлар) уйларига ёғоч тобутларда қайтадилар", деб айтди Муаллим.

Саудия Арабистони 4 февралда АҚШ бошчилигидаги коалиция таркибида Сурияда қуруқликдаги операцияда иштирок этишга тайёрлигини билдирган. The Guardian нашрининг маълумотларига кўра, Саудия Арабистони шу мақсадда Сурияга қуролли кучларининг махсус бўлинмаларининг бир неча минг аскарини юбориши мумкин.