АҚШнинг Калифорния штатида SuperLottoPlus лотореяси ташкилотчилари штат тарихидаги энг катта ютуқ – 63 миллион долларнинг эгасини топа олганича йўқ. Истисно тарзида узайтирилган бир ҳафталик муддат ҳам бошланди. Бу ҳақда ТАСС хабар қилди.

Лоторея шартларига кўра, унинг ғолиби ютуқ чиққан чиптани 5 февраль куни кечки 17:00га қадар олиб келиши керак эди. Бироқ вақт етиб келган бўлса ҳам, ғолибнинг дараги чиқмади. Натижада яна бир ҳафта муддат қўшиб берилди.

SuperLottoPlus вакили Алекс Траверсонинг айтишича, жуда кўпчилик ютуқли чипта соҳиби эканини айтиб мурожаат қилган. “Уларнинг қарийб барчаси чиптани йўқотиб қўйганини тасдиқлашмоқда. Уларнинг сўзлари ҳеч нарсани англатмайди”, - деди у.  Бахтли рақамларга эга чипта 2015 йилнинг 8 августида Лос-Анжелесдаги 7-Eleven озиқ-овқат дўконидан харид қилинган.

Агарда ғолиб аниқланмаса, ютуқ жамғармаси штат мактаблари эҳтиёжларига сарфланади.