Motor1 нашри буюртмасига кўра, айғоқчилар Porsche Panamera автомобилининг универсал кузовга эга янги версиясини суратга туширишга муваффақ бўлишди.

Моделнинг асоси 2012 йили Париж автосалонида намойиш этилган Panamera Sport Turismo концепт-карига ўхшаб кетади. Аввалроқ, янги “Панамера”ларнинг хетчбек кузовли версияси расмлари, шунингдек интерьерининг суратлари ҳам тарқаганди.

Моделнинг мультимедиа тизими катта экран эга ва аввалгидан анча кучайтирилган. Марказий консолдаги анъанавий тугмалар сенсорга алмаштирилган.

Porsche Panamera`нинг янги авлоди фольксвагенга хос MSB модулда ишланади. Конструкциядаги ўзгартиш сабаб хетчбек янада енгил бўлади. Яъни алюминий, магний ва ўта қаттиқ темирдан ишлангани сабабли аввалги версиядан 91 кг камроқ тош босади.

Олти ва саккиз цилиндрли двигателлар янги автомобиль учун махсус қайта ишлаб чиқилди. Гибрид модификация ҳам такомиллаштирилди. Porsche`нинг етакчи муҳандиси Вольфганг Хатцнинг сўзларига кўра, хетчбекнинг V6 ва V8 мотори имконияти спорт машиналариникига яқин бўлади.

Panamera`нинг янги авлоди 2017 йилда автобозорларга чиқарилиши кутилмоқда.