2016 йил бошидан бери Туркиядан Греция ороллари томон денгиз орқали 68 мингдан кўпроқ қочқин ўтган, деб хабар берди 7 февралда БМТнинг қочқинлар ишлари бўйича бошқармаси (UNHCR). UNHCR маълумотларига кўра, 1 февралдан 6 февралгача Туркиядан Эгей денгизи орқали Грецияга 2870 муҳожир ўтган.

БМТ маълумотларига кўра, шу кунлари Туркиядан Грецияга ўтган кўпчилик муҳожирлар сурияликлар (55 фоиз) бўлган. Шунингдек, муҳожирлардан 25 фоизи Афғонистондан, 11 фоизи Ироқдан, 3 фоизи Покистондан бўлган. Бундан ташқари, йил бошидан бери денгиз орқали ўтишда камида 366 нафар одам ҳалок бўлган ёки бедарак йўқолган.

Деярли ҳамма муҳожирлар Грециядан "Болқон йўналиши" деб аталувчи йўналиш орқали Австрия ва Германияга жўнайдилар. Айни вақтда Греция-Македония чегарасида 5-7 минг одам Македонияга тушишни кутмоқда.

Македониялик чегарачилар фақатгина суриялик, афғонистонлик ва ироқлик муҳожирларни кичик гуруҳлар билан чегарадан ўтказмоқдалар. Маҳаллий расмийларнинг айтишича, бошқа давлатлар фуқароларига чегарани кесиб ўтишда контрабандачилар ёрдам бермоқда.