Google’нинг картондан ишланган виртуал реаллик шлеми Google Cardboard нафақат қизиқ пиар-лойиҳа, балки виртуал реалликка чўмиш учун "жиддий" қурилмани ишлаб чиқариш олдидан синов бўлганга ўхшайди. The Financial Times нашри маълумотларига кўра, Google жорий йилда Samsung Gear VR шлемига ўхшаш ҳақиқий шлемни ишлаб чиқаради.

Маълум қилинишича, гаджет пластик корпусдан ишланади ҳамда Samsung’нинг шлемидан кўра кўпроқ смартфонларни қўллаб-қувватлайди. Нашр манбаларининг таъкидлашича, Google’нинг VR–шлеми сифатли сенсор ва линзалар билан жиҳозланади.

Google Cardboard шлеми 1,5 йил аввал намойиш қилинган ва ўзидан пластик линзаларга эга, смартфон ўрнатилувчи йиғилувчи картонни намоён қилади. Янги қурилма ҳам катта даражада смартфоннинг ҳисоблаш қувватига таянади.

The Financial Times нашри маълумотига кўра, янги VR-шлем баҳордаги Google I/O анжуманида намойиш қилиниши, сотувга эса сентябрда чиқарилиши мумкин. Шлем тақдим қилиниши билан бир вақтда Android мобиль операцион тизимининг виртуал реалликни қўллаб-қувватловчи модификацияси Android VR ҳам тақдим қилиниши мумкин.