Қозоғистон Эронга локомотивлар экспорт қилиш имкониятини муҳокама қилмоқда, деб маълум қилди Қозоғистоннинг "Байтерек" миллий холдинг компанияси раиси Қуандиқ Бишимбаев, деб ёзмоқда "Интерефакс" ахборот агентлиги.

"Бугун Эронга Қозоғистонда ишлаб чиқарилган локомотивларни экспорт қилиш муҳокама қилинмоқда. Қозоғистон тараққиёт банки экспорт молиялаштириш бўйича музокараларда иштирок этмоқда", деб маълум қилди Бишимбаев Теҳронда бўлиб ўтган Қозоғистон-Эрон бизнес-анжуманида журналистларга.

Холдинг раҳбари 2015 йилда Қозоғистон локомотивлари Озарбайжонга етказиб берилганини эслатиб ўтди. Экспорт операцияси молиялаштирилиши холдингнинг шўъба корхонаси – Қозоғистон тараққиёт банки орқали амалга оширилган.

Бишимбаев Эрон билан экспорт операцияси ҳам шу схема бўйича молиялаштирилиши мумкинлигини айтди. Унинг айтишича, Кентау трансформатор заводи ҳам анжуман вақтида ўзига эронлик ҳамкорлар топган.

Қозоғистоннинг локомотивлар ишлаб чиқарувчи заводи "Локомотив курастыру зауыты" АЖ 2009 йилда ташкил топган. Корхонанинг 50 фоиз акцияси "Казахстан темир жолы"га ва қолган 50 фоизи Россиянинг "Трансмашхолдинг" ЁАЖга тегишли.