Муқимий номидаги ўзбек давлат мусиқали театрида “Лайли ва Мажнун” спектаклининг премьераси бўлиб ўтди.

Хуршид драмаси асосида Шуҳрат Ризаев томонидан қайта ишланган асарни Ўзбекистон халқ артисти Мирза Азизов саҳнага олиб чиқди. Безак ва декорациялар муаллифи – Бахтиёр Тўраев. Лайли ролини Дилором Абдуолимова, Қайс ролини Равшан Иброҳимов талқин этган.

Спектаклда, шунингдек, Ўзбекистон халқ артисти Мариям Ихтиёрова, Ўзбекистон Республикасида хизмат кўрсатган артистлар Александр Бекжонов, Турғун Бекназаров, Дилором Сафоева турли даражадаги образларни яратишган.

Саҳна асарида меҳр-муҳаббат, садоқат, соф севги, Қайс ва Лайлининг ўз аҳду вафоси йўлидаги кураши, чеккан заҳмат ва изтироблари таъсирчан воқеалар воситасида очиб берилган. Айниқса, асарда гавдалантирилган Навоий сиймоси муайян воқеа ва ҳодисаларга шоир муносабатини баён этишда ўзига хос янгилик бўлган.

Манба: uza.uz