Ўтган йилнинг ноябрь ойида Чехиянинг Ottovo Nakladatelství нашриёти чоп этган “Жаҳоннинг футбол харитаси”да Қрим Россияга тегишли ҳудуд сифатида кўрсатилган. ČTK агентлигининг маълум қилишича, бу ҳол Украинанинг Чехиядаги элчихонаси томонидан кескин танқид остига олинди.

Китобда ФИФАга аъзо 209 давлат ҳақида маълумот тўпланган. Унда Қрим Россиянинг қолган ҳудуди билан бир хил рангга бўялган. Бундан ташқари, жаҳоннинг умумий харитасида ярим орол Украина таркибида эмас.

Украинанинг Прагадаги элчиси Борис Зайчук нашриётга мурожаат қилиб, Украинанинг чегараларини халқаро ҳуқуқ талабларига мослаб кўрсатишни талаб қилди.

“Украинанинг Қримсиз кўрсатилиши халқаро ҳуқуққа зид бўлиб, Европа Иттифоқи давлатларининг Қримнинг Россия Федерация томонидан оккупация қилинишини тан олмаслик борасидаги позициясини инобатга олмайди”, - таъкидлади дипломат.