The Walt Disney медиакорпорациясининг ҳисоботига кўра, унинг Studio Entertainment бўлимининг операцион даромади "Юлдузлар жанглари"нинг янги 7-қисми намойишлари эвазига 86 фоизга, яъни 1 млрд долларгача ошди, деб хабар бермоқда RNS нашри.

Disney жорий йилнинг 1-чораги учун рекорд даражадаги 2,88 млрд доллар соф фойда олганини маълум қилди. 2015 йилда бу кўрсаткич 2,18 млрд долларни ташкил қилган. Даромаднинг ўсиши 32 фоизни ташкил қилди. Киностудиянинг 1-чоракдаги умумий тушуми 15,2 млрд долларни ташкил қилганди.

"Юлдузлар жанглари"нинг ажойиб кўрсаткичлари эвазига бизнинг компаниямиз ўз тарихида рекорд даражадаги чораклик фойда олди ҳамда кетма-кет 10 чоракдан бери акцияларига даромадларининг икки рақамли кўринишдаги ўсишига эришди", деб айтди киностудия президенти ва бош директори Роберт Айгер.

2015 йилнинг 16 декабрида экранларга чиққан фильм бир нечта рекордларни ўрнатишга муваффақ бўлди. 21 декарбда фильм экранларга чиқишининг 1-уик-эндида жаҳон прокатида Хитойни ҳисобга олмаганда рекорд даражадаги 528 млн доллар йиғди.

27 декабрда фильм касса йиғимлари тезлиги бўйича рекорд ўрнатди: фильм 12 кун давомида 1 млрд доллар йиғишга муваффақ бўлди. 6 январда фильм Шимолий Америкадаги касса йиғимлари бўйича "Аватар"га тегишли бўлган рекордни янгилади.

Фильмнинг жаҳон бўйича касса йиғими 2 млрд доллардан ошиб кетди. Фильм ҳозирча энг кассабоп фильмлар учталигига кирди. Уни ҳозирча Жеймс Кэмероннинг "Аватар" ва "Титаник" фильмлари ортда қолдирмоқда.

Фильмнинг 8-қисми 2017 йилда, 9-қисми эса 2019 йилда чиқарилади.