Германиянинг Бавария федерал ерида иккита йўловчи поезди тўқнашиб кетиши оқибатида бир нечта вагонлар темир йўл изидан чиқиб кетган. Тўқнашув оқибатида 9 киши ҳалок бўлгани, 150 га яқин киши жароҳат олгани ҳақида маълумотлар олинган.

Дастлабки маълумотларга кўра, тўқнашувга инсон омили сабаб бўлган, деб хабар бермоқда ҳуқуқ-тартибот муассасаларидаги манбаларга иқтибос келтирган ҳолда RedaktionsNetzwerk Deutschland ахборот тармоғи.

ОАВда маълум қилинишича, диспетчерлардан бири кеч қолаётган поездни ўтказиб юбориш учун автоматик сигнал тизимини ўчириб қўйган. Кеч қолаётган таркиб йўлларнинг тармоқланишида бошқа йўлга ўз вақтида ўтиши ва рўпарадан келаётган поезд билан тўқнашувдан қочиши керак бўлган. Бироқ поезд бунга улгура олмаган, бошқа поездга эса яшил чироқ, яъни юришга рухсат берилган. Биринчи поезд диспетчер кўрсатмасига амал қилиб, қизил чироқ ёнаётганига қарамасдан юришда давом этган.

Таъкидланишича, бу версиянинг расмий тасдиғи йўқ.