Ўзбекистондаги шоу-бизнес ҳаётини ёритишга ихтисослашган бир қатор нашрларда “Ниҳол” мукофоти совриндори бўлмиш хонанда Отабек Муталхўжаев бўйдоқлар сафини тарк этаётгани ҳақида хабар берилди. Хабарларда айтилишича, унинг никоҳ тўйи маросими 14 февраль Тошкент шаҳридаги "Versal" ресторанида бўлиб ўтади.

Kun.uz сайти хонанданинг продюсери Феруза Нодирова билан боғланганида эса у бу ҳақдаги саволга жавоб беришдан қатъиян бош тортган.

"Мен бу саволга жавоб бермайман. Буни кеча ҳам, ундан олдин ҳам айтгандим", дея қўпол оҳангда гапириб, телефон гўшагини қўйди у.

Бундан олдинроқ нашрлардан бирига берган интервьюсида у "ўзининг тасаввуридаги идеал аёл ўз уйини саранжом-саришта тутадиган, бир касбнинг эгаси, ички ва ташқи дунёси чиройлилигига этибор берадиган, пазандалиги, уятчан, камгаплиги билан ажралиб туриши, қисқаси гўзал ва рўзғорбоп бўлиши кераклиги" ҳақида айтганди.

Маълумот учун, 1984 йилнинг 18 июлида Тошкент шаҳрида туғилган Отабек Муталхўжаев 2004 йилдан буён ўзбек эстрадасида фаолият кўрсатиб келмоқда. У 2005 йилда Тошкент Давлат техника университетини тамомлаган.