Ҳолливуд актёри Жонни Депп АҚШ президентлиги учун номзод бўлган Дональд Трамп образини яратди. New York Times нашри берган маълумотга кўра, фильм «Савдолашиш санъати» деб номланган бўлиб қисқа метражли кўринишда суратга олинган.

Мазкур картинани Funny or die юмористик сайтида томоша қилишингиз мумкин. Фильм 50 дақиқа давом этиб, унда Трампнинг ёшлиги ҳақида ҳикоя қилинади.

Сюжетга кўра, Трамп 1980 йилларда ўзи сценарий ёзиб, ўзи режиссёрлик, продюсерлик ва бош ролни ижро этган фильм суратга олади. Бироқ фильм тайёр бўлганида, Трамп уни токчага қўйиб қўйишни буюради. Лентани Рон Ховард (фильмнинг ҳақиқий режиссёри) топиб олмагунига қадар у чанг босиб ётади. Шундан кейин Ховард уни томошабинлар эътиборига тақдим қилади.