“Камолот”да бир кун” лойиҳаси Ўзбекистон Республикаси президенти ҳузуридаги давлат бошқарув академияси тингловчилари иштирокида ташкил этилди.

Мирзо Улуғбек туман Кенгашининг фаолияти юзасидан 2015 йил давомида қилинган ишлари ва 2016 йилга режалаштирилган ишлари бўйича маълумотлар келтириб ўтилди. Тадбирнинг очилиш қисми Мирзо Улуғбек тумани ҳокими ҳамда “Камолот” ЁИҲ Мирзо Улуғбек тумани Кенгаши раисининг кириш сўзлари билан бошланди.

“Камалак”, “Камолот” сардорлари табриги, ҳаракатнинг Мирзо Улуғбек тумани Кенгаши ҳақидаги “Камолот”да бир кун” номли видеофильм намойиши, “Омадли меҳмон” ютуқли ўйини, тумандаги 248-умумтаълим ҳамда 14-сонли мусиқага ихтисослаштирилган мактабларда таҳсил олувчи кичкинтойларнинг ажойиб куй-қўшиқ ва рақслари тадбирда жам бўлганларга манзур бўлди. Айниқса, 2015 йилги қўшиғида “Энг яхши матн муаллифи”, Ўзбекистон ёзувчилар уюшмаси ёшлар билан ишлаш бўлими етакчиси Дарвишев Хушнудбекнинг фикрлари ва ижоди барчани руҳлантирди.

Юқорида айтиб ўтилганидек, тадбир давомида “Камолот” ёшлар ижтимоий ҳаракати Мирзо Улуғбек туман Кенгаши қошидаги “Ёшлар ижтимоий ҳизматлари” маркази ўқувчилари ҳамда “Баркамол авлод” ёшлар ижодиёти маркази ўқувчилари томонидан яратилган буюмлар кўргазмаси ташкил этилди.

Шу билан биргаликда, санъатнинг тасвирий санъат йўналиши бўйича кўплаб ютуқларни қўлга киритган Камолиддин Беҳзод номидаги миллий рассомлик ва дизайн институти талабаларининг ижодий ишлари намойиши бўлиб ўтди. Бинонинг фойесида тадбирга ташриф буюрган меҳмонлар ва иштирокчиларга хуш кайфият улашиш мақсадида, Ўзбекистон давлат санъат ва маданият институти талабалари ҳамда В.Успенский номидаги Республика ихтисослаштирилган мусиқа академик лицейининг истеъдодли ўқувчилари томонидан йиғилганлар эътиборига ўзбек ва жаҳон мусиқа асарлари намуналари ҳавола қилинди.

Тадбир якунида фаол ва иқтидорли ёшлар ҳаракатнинг туман Кенгаши томонидан ташаккурнома ва эсдалик совғалари билан тақдирланди.