Ўзбекистон Республикаси Олий ва ўрта махсус таълим вазирлиги ҳузуридаги «Маънавият ва маърифат» марказида «Соғлом она ва бола – юрт келажаги» деб номланган кўрик-танлов бўлиб ўтди.

Бўлғуси оналарнинг маънавиятини юксалтириш, саломатлигини мустаҳкамлаш, уларни миллий ҳаёт тарзимизга зид ғоялар таъсиридан ҳимоялаш мақсадида ташкил этилган «Соғлом она ва бола – юрт келажаги» танловида иштирокчи қизларнинг одоб-ахлоқи, чаққонлиги, зукколиги, саломатлик борасидаги билими синовдан ўтказилди, деб хабар беради Ўзбекистон миллий ахборот агентлиги.

Танлов якунларига кўра, Р.Глиэр номидаги республика ихтисослаштирилган мусиқа академик лицейи ўқувчиси Ойдиной Баротова биринчи, Тошкент шаҳридаги Турин политехника университети хузуридаги академик лицей ўқувчиси Шаҳноза Ҳакимова иккинчи, Тошкент маданият коллежи ўқувчиси Дилдора Салимова учинчи ўринни эгаллади. Ғолиблар махсус диплом ва эсдалик совғалари билан тақдирланди.