Ўзбекистон Республикаси Меҳнат ва аҳолини ижтимоий муҳофаза қилиш вазирлиги томонидан Корея Халқаро ҳамкорлик агентлиги (KOICA) билан ҳамкорликда “Ўзбекистонда касб-ҳунарга ўқитиш имкониятларини ривожлантириш” лойиҳаси доирасида Тошкент шаҳри Сергели туманида Корея Республикаси Ҳукуматининг грант маблағлари ҳисобига Касб-ҳунарга ўқитиш маркази ташкил этилганди. Марказ 360 ўқувчи ўринга эга бўлиб, бошқа ҳудудларджан келган ўқувчилар учун қулай шароитларга эга бўлган 100 ўринли ўқувчилар турар жой биноси ҳам мавжуд.

Марказда “Машинасозлик ишлаб чиқариш технологиялари” (токарлар, фрезерчилар, пайвандчилар, металлга ишлов бериш мутахассислари); “Электроника ва электротехника” (электрон қурилмалар, маиший электрон техника, радио ва телеаппаратларни таъмирлаш ва сервис хизмати кўрсатиш мутахассислари); “Автомобилларни таъмирлаш ва уларга техник хизмат кўрсатиш” (авточилангарлар, моторчилар, автотранспорт воситаларини диагностика қилиш, таъмирлаш ва техник хизмат кўрсатиш); “Ахборот технологиялари ва тизимлари” (компьютерларни дастурлаш, компьютер ва бошқа оргтехникага хизмат кўрсатиш ва таъмирлаш) мутахассисликлари бўйича ўқитилади.

Ўқиш муддати – 10 ой, шундан бевосита марказда касб-ҳунарга ўқитиш 6 ой, қолгани корхоналарда ишлаб чиқариш амалиёти ўташ учун.

Ўтган қисқа давр ичида бу ерда 1500 нафардан ортиқ ёшлар касб-ҳунарга қайта ўқитилди ва уларнинг кўпчилиги аввалдан тузилган шартномалар асосида Ўзавтосаноат, Ўзэлтехсаноат, Ўзтелеком, Тошавтотеххизмат, “GM Powertrain Uzbekistan”, Ўзагромашсервис, Тошкент труба заводи, Тошкент Қуюв-механика заводи, ГСКБ Ирригация заводи, Электроаппарат заводи, Бекобод Металлургия комбинати, Тошавтотеххизмат, «Шарқ» компанияси қошидаги корхоналарда фаолият юритишмоқда.

Яқин келажакда Ўзбекистон Республикаси ва Корея Республикаси Ҳукуматлари ўртасида имзоланган Келишувлар доирасида Самарқанд, Шаҳрисабз, Қўқон ва Урганч каби шаҳарларда ҳам ан шундай Касб-ҳунарга ўқитиш марказларини ташкил этиш режалаштирилган.