“Агробанк” Ягона умумреспублика процессинг марказининг PayMe сервисига уланган иккинчи банк бўлди. Бу сервис жисмоний шахсларга бир банк доирасида картадан картага маблағ ўтказиш имконини беради. Ушбу банкни илк бора “Алоқабанк” жорий этганди.

Пулни UzCard миллий тўлов тизими сайтидаги шахсий кабинетдан амалга ошириш мумкин. Ойига фақат 1 млн сўм ўтказиш мумкин. Хизмат тўлови – ўтказма ҳажмидан 2 фоиз. Пул дарҳол ўтказилади.

Февраль ойининг охирига қадар сервисга яна 10та банк уланиши кутилмоқда, деб хабар беради Gazeta.uz процессинг маркази директори Фаррух Зияевга таянган ҳолда. Ҳозир марказ банклар билан музокаралар олиб бормоқда.

“Барча банкларни улаш бўйича ишлар якунланганидан сўнг турли банкларнинг карталари ўртасида пул ўтказишни ташкиллаштириш борасида ишлар бошланади. Техник жиҳатдан биз бу нарсага шаймиз” – таъкидлади мутахассис.

Зияевга кўра, бу хизмат кейинчалик Click тизимига ҳам киритилади, пул ўтказиш лимити эса кўпайтирилади.