Қозоғистон президенти Нурсултон Назарбоев апрель охирида Эронга расмий сафар уюштиради. Бу ҳақда Қозоғистоннинг инвестицияар ва ривожланиш вазирлиги расмий сайтида маълум қилинди.

Назарбоевнинг бўлажак сафари деталларини Эрон ҳукуматининг биринчи шахслари билан Қозоғистоннинг инвестицияар ва ривожланиш вазири Асет Исекешев Эронга сафари давомида муҳокама қилди.

Исекешев сафар давомида Эроннинг фан ва технологиялар бўйича вице-президенти Сурна Сатторий, Эрон ташқи ишлар вазири Муҳаммад Жавод Зариф, саноат, конлар ва савдо вазири Муҳаммад Ризо Зариф, қишлоқ хўжалиги вазири Маҳмуд Хўжатий ҳамда турли тармоқларда фаолият юритувчи йирик компаниялар вакиллари билан учрашди.

Эрон вице-президенти Сурна Сатторий ахборот-коммуникация технологиялари, стартапларни ривожлантириш, коинот соҳасида ҳамкорликни мустаҳкамлаш истаги борлигига эътиборни қаратди.

Томонлар бир неча йўналиш, жумладан савдо ва инвестициялар бўйича ишларни фаоллаштириш ҳақида келишиб олдилар. Бу мақсадда металлургия, озиқ-овқат, машинасозлик, сайёҳлик ва молия соҳаларида 6 та ишчи гуруҳ ташкил этилади.

Бундан ташқари, учрашувда авиарейслар сонини ошириш, икки давлат банклари ўртасида ўзаро тўловларни хорижий валютада ўтказиш, виза тартибини енгаллаштириш масалалари кўтарилди.