Қозоғистоннинг Остона шаҳрида қурилиши ишлари бошланган "Абу-Даби Плаза" мажмуаси ҳудудида чиққан ёнғин бутунлай ўчирилди. Бу ҳақда Tengrinews нашри Қозоғистон ички ишлар вазирлигининг фавқулодда вазиятлар қўмитаси расмий вакили Руслан Иманқуловга асосланиб хабар қилган.

"Ўт ўчириш ишларида ҳаракатланиш учун 4та махсус гуруҳ ташкил этилди. Улардан икки гуруҳ (40 кишидан таркиб топган) бино ичида ишлади", дейди у.

Унинг сўзларига кўра, ёнғин вақтида 120 киши эвакуация қилинган, жароҳатланганлар йўқ. Ўт ўчирувчилар воқеа жойига етиб келишганида 11-қаватдан 25-қаватгача бўлган ҳудудда ёнғин давом этаётган эди. Расмий маълумотга кўра, маҳаллий вақт билан соат 04.40 да чиққан ёнғин соат 08.25да (Тошкент вақти билан 07.25да) ўчирилган.

Айни вақтда ёнғиннинг келиб чиқиш сабабларини ўрганиш учун махсус ходимлар иш олиб боришмоқда.

Ушбу иншоот қурилиши якунлангандан кейин Марказий Осиёдаги энг баланд бинога айланиши кўзда тутилган.

Янги бинонинг баландлиги лойиҳа бўйича 380 метрдан кўпроқни ташкил қилиши керак. Таққослаш учун, Останкино телеминорасининг баландлиги 540 метрни, "Москва-Сити" мажмуасининг энг баланд минораси ("Федерация. Восток") 374 метрни ташкил қилади.

Остонада Марказий Осиёда энг баланд бўлиши кутилган бинода ёнғин чиқди