Туркия артиллерияси Суриянинг Ҳалаб вилоятида жойлашган Миннех авиабазасига ўт очди. Бу ерда ҳарбий аэродром жойлашган. Бу ҳақда РИА “Новости” ахборот агентлиги маълум қилди.

Ўт очишдан олдин Туркия бош вазири Аҳмет Довудўғлу Туркия суриялик курдлар позицияларига ҳужум қилиши мумкинлигини айтганди.

"Агар керак бўлса, биз Ироқдаги каби чоралар қабул қилишимиз мумкин. Умид қиламизки, бизнинг дўстларимиз ва иттифоқчиларимиз бизни қўллаб-қувватлайдилар", деб айтганди Довудўғлу.

11 февралда Сурия кўнгилли аскарлари отрядлари турк курдлари билан бирга Миннехдан "Жибҳад ан-Нусра" жангариларини сиқиб чиқарганди. Жангарилар бу ердаги аэродромни 3 йил давомида эгаллаб турган.

Миннех стратегик аҳамиятга эга авиабаза ҳисобланади, чунки у Сурия чегарасидан келувчи ҳукумат автотрассасида жойлашган.

Аввалроқ Туркия ташқи ишлар вазири Мавлуд Човушўғлу Туркия ва Саудия Арабистони агар натижани кафолатлайдиган стратегияни ишлаб чиқа олсалар, Сурияда қуруқликдаги операцияни бошлашларини маълум қилганди.