Саудия Арабистони бошчилигида коалиция кучлари Яманнинг аҳоли яшайдиган ҳудудларида АҚШда ишлаб чиқарилган кассетали ўқ-дориларни қўллашни давом эттирмоқда. Гап бир неча йиллар аввал эмас, балки яқиндагина Саудия Арабистонига берилган ўқ-дорилар ҳақида кетмоқда. Бу ҳақда Human Rights Watch ҳуқуқни ҳимоя қилиш ташкилоти маълум қилди.

Ташкилот маълумотларига кўра, кассетали бомбаларни қўллашнинг охирги ҳолати 2015 йилнинг 13 декабрида Худайдо порт шаҳрида юз берган. Бу зарба оқибатида бир аёл икки боласи билан жароҳат олганди.

"Саудия Арабистони коалиция бўйича иттифоқчилари билан ва АҚШлик етказиб берувчилар кўмагида жаҳон стандатларини инобатга олмаяпти. Бу стандартлар кассетали ўқ-дорилар ҳеч қачон ва ҳеч қандай вазиятда қўлланмаслиги лозимлигини кўрсатади", деб айтди Human Rights Watch вакили Стив Гуз. Гуз ташкилот номидан Саудия Арабистонидан "жабр кўрган тинч аҳоли ҳақидаги маълумотларни тергов қилишни ва кассетали ўқ-дориларни қўллашни зудлик билан тўхтатишни" талаб қилди.
5 январда БМТнинг инсон ҳуқуқлари бўйича Олий комиссари бошқармаси Яманда коалиция кучлари томонидан кассетали бомбаларнинг қўлланиши борасидаги хабарлар юзасидан хавотир билдирганди.