Ўзбекистон Республикаси Қишлоқ ва сув хўжалиги вазирлигида ўтказилган “Аграр соҳада хорижий инвестициялар – барқарор ривожланиш омили” мавзуидаги матбуот анжуманида Ўзбекистонда хорижий инвестициялар иштирокида соҳага замонавий, юқори самарали ресурстежамкор технологияларни жорий этиш борасида амалга оширилаётган лойиҳалар ва уларнинг натижалари хусусида маълумотлар берилди.

Унга кўра, 2003–2015 йиллар мобайнида хорижий давлатлар ва халқаро молиявий муассасаларнинг кредит ва грант маблағлари ҳисобидан умумий кредит қиймати 1310 млн АҚШ долларилик 36 та инвестицион лойиҳа доирасида 760,4 млн долларлик ишлар бажарилиб, 1635 тадан ортиқ ҳар хил гидротехник иншоотлар, 262 км узунликда суғориш тармоқлари қурилди, 274 км хўжаликлараро коллекторлар, 745 км ички хўжалик коллекторлар ва 553 км ёпиқ ётиқ дренажлар реконструкция қилинди, 1174 га майдонда лазерли текислаш ишлари амалга оширилди, 264 та экскаватор, 51 та бульдозер, 8 та земснаряд, 4 та гидротурбина, 56 дона йирик насос агрегатлари олиб келинган.

Шунингдек, 800 га яқин фермер хўжаликлари ва қишлоқ хўжалиги корхоналарига 75 млн АҚШ долларидан зиёд имтиёзли кредит маблағлари ажратилиши натижасида 1500 гектардан ортиқ интенсив боғ ва узумзорлар барпо этилди, 200 гектардан кўпроқ майдонда иссиқхоналар қурилди, умумий ҳажми 5,0 минг тоннадан зиёд бўлган қишлоқ хўжалиги маҳсулотларини қайта ишлаш ва қадоқлаш цехлари ишга туширилди, умумий сиғими 25,0 минг тоннадан кўпроқ бўлган музлаткичли омборхоналар фойдаланишга топширилди ҳамда мингдан ортиқ қишлоқ хўжалиги техникалари харид қилинди.