Филиппин ҳукумати собиқ диктатори марҳум Фердинанд Маркоснинг оиласига тегишли қимматбаҳо тақинчоқлар очиқ ким ошди савдосига қўйилади. Халқаро мутахассисларнинг баҳолашича, уларнинг нарҳи 1 миллиард песо (21 миллион доллар) дан кам эмас.

1986 йилда халқ қўзғалон кўтаргач, 20 йиллик ҳокимиятидан сўнг Маркос ва унинг оиласи Гавайяга қочиб кетади. Тўнтариш пайтида қўлга киритилган ва ҳозир сотувга қўйилган хазинада, жумладан – 5 миллион доллардан кам бўлмаган 25 каратли бриллиант ва олдинроқ 30-50 минг доллар деб баҳоланган, лекин ҳозир ундан бир неча баробар қиммат ҳисобланган олмос тиара Cartier бор.

Ҳукумат аъзолари ким ошди савдосини мамлакатнинг амалдаги президенти Бениньо Акино III нинг ваколат муддати тугагунига қадар, яъни 2016 1илнинг июнь ойига қадар ўтказишга умид қилаётганларини билдирдилар.

Ҳукумат тасарруфидаги хусусийлаштириш кенгаши ушбу савдони қўллаган бўлса-да, судда ҳали ҳам баъзи келишмовчиликлар ҳал этилмоқда.