Британиялик актёр Дэниел Крэйг янги сериалдаги роли сабабли жосус Жеймс Бонд ролига қайтиши даргумон бўлмоқда, деб хабар бермоқда Sky News. Мавжуд маълумотларга кўра, актёрга Жонатан Франзеннинг "Пьюрити" китобининг телевизион саҳналаштирилишида роль таклиф қилинган. Айни вақтда бу сериалнинг 20 та сериясига буюртма берилган, бу эса Крэйгнинг жосус 007 ролига қайтиш эҳтимолини мураккаблаштириши мумкин.

Актёрнинг жосус роли билан хайрлашишни истаётгани ҳақида ҳозирча расмий маълумот йўқ. Аввалроқ Крэйг Бонд ҳақидаги фильмларда ўзининг иштироки борасида қарор қабул қилмаганини айтган.

Крэйг Бонд ролини биринчи марта 10 йил аввал " Казино "Рояль" фильмида ижро этган. Бонд ҳақидаги унинг иштирокидаги 4-фильм "007: Спектр" "Юлдузлар жанглари: Кучнинг уйғониши" фильмидангина ортда қолиб, 2015 йилда Буюк Британиянинг энг кассабоп фильмлари рўйхатида 2-ўринни эгаллаган.

Таъкидланишича, янги сериалнинг продюсери аввал Крэйг билан "Аждарҳо татуировкаси бор қиз" фильмида бирга ишлаган Скотт Рудин бўлади.