Жанубий Қозоғистон вилоятидаги коллежнинг барча ўқитувчилари ишдан бўшатилди. Бунга математика ўқитувчисининг баҳоларни савдолашгани сабаб бўлган. Бу ҳақида Tengrinews.kz хабар берди.

Бу воқеа жорий йилда Тюлькубасск агробизнес ва туризм коллежида содир бўлган. Маълум бўлишича, таълим муассасаси математика ўқитувчиси Нуржамал Жанбосиновани 11 февраль куни Қозоғистон Республикаси Меҳнат кодексининг 52-моддасига биноан ишдан бўшатган. Шундан сўнг коллежда Жанубий Қозоғистон вилояти Таълим бошқармаси вакиллари ҳам текширув ўтказган.

"Комиссия хулосасига кўра, коллеж директори Бакит Даулетов, шунингдек, бўлим бошлиқлари Ж.Килибаева ва Т.Бектуровлар ишдан бўшатилди. Бундан ташқари, Қозоғистон Республикаси Меҳнат кодексининг 64-моддасига биноан, коллежнинг бўлим бошлиқлари К.Сейитжаппарова ҳамда З.Уразбаеваларга қаттиқ ҳайфсан берилди”, дейилади хабарда.

Эслатиб ўтамиз имтиҳон пайтидаги баҳо савдоси жараёни талабалар томонидан тасвирга олиниб, ижтимоий тармоқларга тарқатиб юборилганди. Видеотасвирда педагогнинг имтиҳон учун 2000 танга, баҳолар дафтарчаси учун 1500 танга нарх белгилагани акс этган. Степендия чиққандан сўнг, пул беришни ваъда қилиб, қарзга баҳо қўйиш сўралганида, аёл рад жавобини беради. Маълум бўлишича, мазкур ўқитувчи 27 йилдан буён таълим соҳасида фаолият юритиб келган.