Ўзбекистонда хизмат кўрсатган артист, актриса ва шоира Раъно Ярашева “Ҳордиқ” газетасига берган интервьюсида ҳозирги замон келинларига шукр етишмаётганини айтди. “Биласизми, онамларимиз қандай оғир шароитларда яшашган. Ҳозир ҳар бир келинчакнинг уйидаги ошхонасида овқат пиширишга газ тайёр, иссиқ-совуқ сув тайёр”лигинни, бундай шароитларнинг қадрига етиб, шукр қилиб яшаш кераклигини таъкидлади.

“Келинларимиз бир қариндошиникида тўй бўлиб, янги кўйлак кийса, кейинги қариндошининг тўйида “Вой, нима кияман?”, деб туришади. “Ўтган сафарги янги кўйлак бор-ку”, десангиз, “Йўқ, уни ҳамма кўрган бошқасини олишим керак”, деган гапи тайёр”.

Бу ҳақида куйиниб гапирган Раъно Ярашева “Ўнг томондаги қўшнингизга қараб, фикр қилинг, чап томондагисига қараб, шукр қилинг”, дейди.
Шунингдек, суҳбат чоғида ўғлига яхши кўрган қизини унинг оиласи, янада аниқроғи, оиласининг дунёқараши тўғри келмагани учун олиб бермаганини ҳам айтиб ўтди ва “Икки оиланинг қарашлари бир-бирига мутаносиб бўлмаса, севишганларнинг турмуши узоққа бормайди”, дейди.

Қаттиққўллик борасидаги саволга “Яратган ролларимда қаттиққўл қайнонани ўйнамаган бўлишим мумкин, лекин ҳаётда бўшашган қайнонаман, дея олмайман. Келинга ҳам муомала қилишнинг ўз қонун-қоидаси бор. Қаттиққўллик, талабчанлик билан бирга меҳрибонлик ҳам ўз ўрнида бўлиши керак”, деб жавоб қайтарган актриса.