АҚШ Ҳалаб атрофи ва ичи бўйича авиазарбалар берилиши, жумладан "Чегара билмас шифокорлар" ташкилоти шифохонаси ва Сурия шимолидаги болалар шифохонасининг ўққа тутилишини қоралади ва барча томонларни ўт очишни тўхтатишга чақирди. Бу ҳақда АҚШ Давлат департаментининг баёнотида айтилмоқда.    

"Бу Россиянинг тайёрлигини ва унинг Асад тузумининг ўз халқига нисбатан зулмини тўхтатишга ёрдам бериш имкониятини шубҳа остига қўяди", дейилмоқда хабарда.  

АҚШ Давлат департаменти вакили Жон Кирби "ҳужумларни Асад ва унинг тарафдорлари ҳеч қандай мақсадсиз ва халқаро мажбуриятларни ҳисобга олмаган ҳолда амалга оширмоқда" деб айтди. Бундай ҳаракатлар Мюнхен келишувларига қарши бормоқда, деб айтди Кирби.

"Биз яна бир бор барча томонларни фуқароларга ҳужум қилишни тўхтатишга, инсонпарварлик кўмагини олишни таъминлаш бўйича зудлик билан чоралар кўришга ва жанговор ҳаракатларни тўхтатишга чақирамиз, Сурия бунга жуда муҳтож", деб айтилмоқда баёнотда.

"Чегара билмас шифокорлар" ташкилоти кўмак кўрсатадиган шифохонанинг ўққа тутилиши оқибатида 7 киши ҳалок бўлди. Суриянинг Россиядаги элчиси Риёд Ҳаддод "Россия 24" телеканалига берган интервьюсида шифохонага зарбалар АҚШ самолётлари томонидан берилганини айтди.

Россия Сурияда фақатгина тинч аҳоли бўлмаган объектларга зарба беришини таъкидлаб келмоқда.