Қозоғистон республикаси президенти Нурсултон Назарбоев Олмаотани ривожлантириш ва 2017 йилда бўлиб ўтадиган XXVII Бутунжаҳон Қишки Универсиадага тайёргарлик кўриш бўйича ўтказилган йиғилишда қозоғистонликлар хом-ашё ресурсларисиз яшашни ўрганишлари кераклигини айтиб ўтди.

“Биз устимизга тилла ёмғир ёғишини кутиб ўтиришимиз керак эмас. Ҳар бир инқироз бу - янги тараққиётдан олдинги босқичдир. Эндиликда хом-ашё сиёсатидан йироқлашишимиз лозим. Давлат инқироздан энг кам йўқотишлар билан чиқиш чораларини кўрмоқда”, - деди мамлакат президенти.

Давлат раҳбари қайд этганидек, инқирозга қарши қўшимча чора-тадбирлар қабул қилинган. Уч триллион тангага яқин маблағ 18 мингга яқин янги иш ўринларини ташкил этиш имконини беради.

“Агар курсни ушлаб туришда давом этганимизда, биз барини сарфлаб юборган бўлар эдик. Ҳозир эса пулларни мамлакат ривожи учун сарфлаяпмиз. Эътибор беринг. Чекланганликни ҳисобга олган ҳолда молиялаштиришдан энг оптимал тарзда фойдаланиш лозим”, - деди элбоши.

“Инвестицияларни жалб этиш устида иш олиб бориш керак. Давлат маблағининг ҳар бир тангасида 2-3 танга хусусий инвестиция бўлиши керак”, дея қўшимча қилди у.