Машина салонидан нарсаларни ўғирлаш учун турли йўлларни пухта “ўрганган” гуруҳ қўлга олинган. Ўзбекистон ИИВ барча автомашина эгаларини ҳушёрликка даъват этди.

Машина ўғрилари махсус мослама орқали масофали бошқарув брелогининг сигналини тутгач, бу мослама машинанинг сигнализациясини ўчира олади. Ўғирлик содир этилгач, яна қайта сигнализацияни ёқиш мумкин.

Ёки оддийроқ усул: машина қулфини отвёртка орқали очиш.

Охирги пайтларда “урф”га кирган усуллардан бири, машинада одам бўлса ҳам, билинтирмай кириб, қўлга илинганни ўмариш.

Умуман, машинангиздаги мулкни тортиб олиш усуллари кўп. Энг кўп ўғирликлар содир бўладиган жойлар: савдо-кўнгилочар марказлари, дўконлар, ёқилғи қуйиш шаҳобчалари атрофида содир бўлади.

Хўш, бундай таҳдидлардан қандай ҳимояланиш мумкин? Ўғриларнинг эътиборини жалб қилмаслик учун машинада сумка, қимматбаҳо буюмлар, телефон, ноут бук, пулларингизни қолдирманг. Ҳатто сумкангизда ҳеч нарса бўлмаган тақдирда ҳам, машина ойнасини синдиришлари мумкин.

Доим машинангизни ёпиб юришга одатланинг, бир дақиқага чиқсангиз ҳам.

Машинани махсус сақлаш жойида қолдирсангиз ҳам нарсаларингизни олиб кетинг.

Қимматбаҳо буюмларингизни кўз-кўз қилманг, ҳамманинг олдида пул санаманг.

Қанча эҳтиёт бўлсангиз ҳам машинангизга ўғри тушди, дейлик, дарҳол тегишли жойларга мурожаат қилинг.