16 февраль, сешанба куни маҳаллий вақт билан соат 10:00гача 320дан ортиқ украин юк машиналари Россия ҳудудида қўлга олинди. Бу ҳақда Россия транспорт назорати хизмати хабар тарқатди.

«16.02.2016 йил соат 10:00 ҳолатига кўра, Россия ҳудудида Украинага тегишли бўлган 324та юк автомобили қўлга олинди. Уларнинг энг кўп қисми Марказий ва Шимолий-ғарбий федерал округи ҳудудларида ушлаб қолинган», — дейилади ташкилот хабарида.

Қайд қилинишича, автомобил ҳайдовчиларининг ичида қонунга қарши иш қилгани рўйхатга олинмаган.

Закарпатск вилоятидаги украиналик радикаллар 11 февраль куни Россиядан кириб келаётган юк автомобиллари йўлини ёпиб қўйиш бўйича акция бошлаганди. Кейинчалик бу акцияга Волин, Ровен, Львов, Ивано-Франков, Житомирск, Винницк, Сумск ва Черновицк вилоятлари радикаллари ҳам қўшилишганди. Акция иштирокчилари Украина ҳудудида рус юк машиналарининг ҳаракатланишини расмий равишда тақиқлаш кераклигини талаб чиққан.

Украинадаги вазиятга жавоб сифатида Россия 14 февралдан бошлаб мамлакат ҳудудида украин автомобилларининг ҳаракатларини тақиқлаганди. 15 февраль куни Украина ҳукумати Россияда рўйхатдан ўтган юк машиналарнинг Украина ҳудудида транзит ҳаракатларини вақтинчалик тақиқлангани бўйича расмий маълумот берганди.