Сурияда адоватда бўлган томонлар ўртасида ўт очишни тўхтатиш бўйича ишчи гуруҳ яқин кунларда Женевада ўз ишини бошлайди, деб хабар бермоқда "Интерфакс" ахборот агентлиги.

Бу ҳақда Россия ташқи ишлар вазири ўринбосари, Яқин Шарқ ва Африка давлатлари бўйича президентнинг махсус вакили Михаил Богданов маълум қилди.

Богдановнинг айтишича, Москва ва Вашингтон ишчи гуруҳнинг иш бошлаши санасини ҳозирча келишиб олмадилар.

"Биз ҳозир америкалик ҳамкорларимиз билан гуруҳ ишининг муддатлари ва форматини келишиш бўйича алоқалар ўрнатмоқдамиз", деди Богданов ва гуруҳ ўз ишини яқин кунларда бошлаши кераклигини қўшимча қилди.

Аввалроқ Германия ташқи ишлар вазири Франк-Вальтер Штайнмайер Сурияда ўт очишнинг тўлиқ тўхтатилиши кўп жиҳатдан Россия ва АҚШнинг ўзаро келишувига боғлиқ бўлишини айтганди.

12 февралда Мюнхендаги хавфсизлик бўйича конференцияда томонлар Сурияда бир ҳафта ичида ўт очишни тўхтатишга келишиб олгандилар.