Глобал тармоқ—интернетнинг ривожи инсонларга кўп қулайликлар яратиши билан бирга, турли хафв-хатарларнинг авж олишига ҳам сабаб бўлмоқда. Чунки чексиз-чегарасиз мазкур восита бугун бузуғунчи кучларнинг асоси қуроли ва ғояларини тарғибот қилувчи қурол вазифасини ҳам бажармоқда. Ўзбекистон мусулмонлари идораси раиси ўринбосари Айдарбек Тулеповнинг янги нашрдан чиққан “Интернетдаги таҳдидлардан ҳимоя” номли китоби ана шу масалалар муҳокамасига бағишланган.

Айни кунларда турли таълим даргоҳларида мазкур китоб тақдимотига бағишланган кечалар бўлиб ўтмоқда. Тадбирларда Ўзбекистон мусулмонлари идораси ходимлари, диншунос олимлар, маданият ва санъат соҳаси вакиллари ҳам иштирок этмоқда.

“Бугун маънавий таҳдидлар, асосан, интернет тармоғи орқали амалга оширилаяпти. Бу ҳеч кимга сир эмас. Айниқса, миллатимизга ёт ғоя ва мафкуралар ёшлар онгини захарлаяпти. Бунинг оқибатида одамлар жабр чекаяпти, оилалар пароканда бўлаяпти, болалари етим қолаяпти. Балоғатга етган ҳар бир инсон имонини мустаҳкам қилиб, яхши ва ёмонни фарқлаши зарур. Нафсга берилмаслик, ёмон ишларга бош қўшмаслик икки дунё саодатига эришиш, илмли бўлиш, халқига, миллатига фойда келтириш ҳақида ўйлаши керак.

Турли таҳдидларга қарши курашиш ва ёшларда мафкуравий иммунитетни шакллантириш асослари, бузғунчи ғояларнинг асл қиёфаси Айдарбек Тулеповнинг “Интернетдаги таҳдидлардан ҳимоя” номли китобида ҳаётий фактлар, савол-жавоблар ва психологик тестлар орқали батафсил ифодаланган”, дейди Шайхонтоҳур тумани бош имом хатиби, Шайх Зайниддин жоме масжиди имом хатиби Одилхон қори Исмоилов Ўзбекистон миллий университетида бўлиб ўтган тақдимот маросимида.

Ана шундай тадбирлар Тошкент тиббиёт академияси, ТАТУ, Низомий номидаги Тошкент давлат педагогика университети, Тошкент темир йўллар муҳандислари институти, Тошкент олий ҳарбий техника билим юрти, Тошкент маданият коллежи, ва “Ҳадичаи Кубро” билим юртида ҳам бўлиб ўтди.