Шотландия Қироллик банки (Royal Bank of Scotland, RBS) бир неча йиллардан буён ёш сеҳргар Гарри Поттер ҳақидаги фильмга сармоясини рўкач қилиб солиқларни тўламай юрган.

Ўртача бир миллиард фунт стерлинг (1,45 миллиард доллар) қийматидаги солиқлар ғазнага тушмаган, деб ёзади Bloomberg.

1997 йилдан 2008 йилга қадар RBS фильмларни сотиб олиш, кейин уларни дистрибюторларга ижарага бериш орқали солиқ имтиёзларига эга бўлиб келган эди. Студия, ҳатто фильм фойда келтирмаган тақдирда ҳам 15-20 йил давомида банкка ҳар йили қатъий белгиланган суммани тўлаб туришга рози бўлган.

Шотланди Қироллик банки “Гарри Поттер ва Азкабаннинг маҳбуси”, “Гарри Поттер ва олов Кубоги”, “Троя”, “Бэтмен: муқаддима”, “Чарли ва шоколад фабрикаси” ва бошқа қатор машхур фильмларни сотиб олган.

Ҳуқуқшунос Жолион Моэм фикрича, бу – “солиқлардан қочиш мақсадида ўйлаб топилган пухта ўйинлар”, холос. Шу ўринда у келишувлар ноқонуний бўлмаганини ҳам айтди. 1997 йили Британия ҳукумати кино саноатида иштирок этадиган компаниялар учун яхшигина солиқ имтиёзларини киритган эди. Лекин 10 йилдан сўнг, унинг шартлари оғирлаштирилган.