2016 йилнинг 17-21 февраль кунлари Таиланд пойтахти Бангкок шаҳрида спорт курашлари бўйича катталар ўртасида Осиё чемпионати баҳслари ўтказилади. Мазкур қитъа чемпионатида Ўзбекистон терма жамоаси анъанага кўра ҳар учала спорт турида ҳам ғолиблик учун кураш олиб боради. Бу ҳақда Ўзбекистон Миллий Олимпия қўмитаси матбуот хизмати хабар берган.

Осиё чемпионатига йўл олган Ўзбекистон вакиллари таркибидан бир қатор етакчи спортчилар ўрин олишмаган. Айни пайтда ўзбекистонликларнинг биринчи рақамли полвонлари шу йилнинг 18-20 март кунлари Остона шаҳрида (Қозоғистон) “Рио-2016” Олимпиада ўйинларининг йўлланмалари ўйналадиган нуфузли мусобақага қизғин ҳозирлик кўришмоқда.

Таиландда ўтказиладиган Осиё чемпионатида эса Олимпиада ўйинларининг йўлланмалари ўйналмайди. Шу боис, терма жамоалар мураббийлари лицензион мусобақага олиб борилаётган тайёргарлик режасини бузмасликка ва Бангкок гиламларида ёш, иқтидорли спортчилар имкониятини имтиҳондан ўтказишга қарор қилишган.

Қуйида Осиё чемпионатига йўл олган терма жамоалар таркиби берилган:

Юнон-рум кураши: - Феруз Тўхтаев (-59 кг), Арам Варланян (-66 кг), Нурбек Холмуҳамматов (-71 кг), Дилшод Турдиев (-75 кг), Жонибек Отабеков (-80 кг), Муҳаммадали Шамсиддинов (-85 кг), Суҳроб Фаттоев (-98 кг), Мўминжон Абдуллаев (-130 кг). Мураббийлар: Равшан Рўзиқулов, Ҳайрулла Абдуллаев.

Эркин кураш: - Маҳмуджон Шавкатов (-57 кг), Муҳаммадсиддиқ Жўраев (-61 кг), Маъруф Нуриллаев (-65 кг), Даврон Авезов (-70 кг), Исломиддин Рахимов (-74 кг), Ильфат Раджапов (-86 кг), Суҳробжон Мукаррамов (-97 кг), Диёр Аралов (-125 кг). Мураббийлар: Олим Ҳикматов, Абдурауф Бозорбоев.

Аёллар кураши: - Даулетбике Яхшимуратова (-48 кг), Зуҳра Мустанова (-53 кг), Севара Ешмуратова (-55 кг), Набира Есенбаева (-58 кг), Саломат Кўчимова (-60 кг), Нилуфар Гадоева (-63 кг), Бахтигул Балтаниязова (-69 кг), Лолахон Оринбаева (-75 кг). Мураббийлар: Ахмет Кагарманов, Баҳодир Калимбетов.

Осиё чемпионатида беллашувларни бошқариб борадиган ҳакамлар бригадасидан ўзбекистонлик Ғайрат Абдуллаев ва Тоҳир Ғуломов ҳам ўрин эгаллашган.