Renault компаниясига тегишли Alpine фирмаси Монте-Карлодаги тадбирда Vision концептуал купесини тақдим қилди. Янги машина Alpine француз маркасининг тикланишидан кейинги биринчи моделининг серияолди прототипи ҳисобланади.

Alpine вакилларининг айтишича, моделнинг серияли ишлаб чиқариладиган версиясида "концептда қўлланган стилистик ечимларнинг 80 фоизи сақланиб қолади". Серия тарзида ишлаб чиқариладиган купенинг намойиши 2016 йил иккинчи ярмида, тахминларга Париж автосалонида бўлиб ўтади, 2017 йилдан эса сотувга чиқарилади.

Вазни 1100 кг ни ташкил қиладиган купе Renault Clio RS хот-хэтчининг ишчи ҳажми 1,6 литрдан 1,8 литрга етказилган "турботўртлик" двигатели билан жиҳозланади. Машинанинг стандарт версиясида двигателнинг қуввати 250 от кучига яқинни ташкил қилади.

Кейинроқ моделнинг "қувватланган" RS-модификацияси пайдо бўлади, унинг двигатели қуввати 300 от кучига етказилади. Кучайтирилган двигатель цилиндрлар блокининг бошқача каллаги ва модернизациялашган совитиш тизими билан жиҳозланади.

Мотор 7 поғонали роботлаштирилган узатмалар қутиси билан биргаликда ишлайди. Узатмалар қутиси иккита илашишли бўлиб, унинг дастаги руль чамбари остида жойлашган бўлади. Alpine’да таъкидланишича, машина 0 дан 100 км/соат тезликка 4,5 сониядан камроқда эришади.

Янги спорткарнинг нархи 50 минг евродан бошланади. Купе Audi TT, Porsche Cayman ва Alfa Romeo 4C билан рақобталаша олади.

Французлар қайта тикланган марка ягона модель ишлаб чиқариш билангина чекланиб қолмаслигини айтмоқдалар. Спорткар муваффақиятга эришса, Alpine гибрид двигатель ва тўлиқ приводли кроссовер яратади.

Alpine маркасидаги машиналар ишлаб чиқарилиши 1995 йилда тўхтатилган эди. 2012 йилда Renault компанияси Caterham фирмаси билан машҳур спорткарлар ишлаб чиқарувчисини тиклашга қарор қилди. 2014 йилда Renault билан Caterham орасидаги келишув ошкор қилинмаган сабабларга кўра бекор қилинган, бироқ Renault брендни тиклаш билан бир ўзи шуғулланишни давом эттирган.