Асли наманганлик, Туркиянинг Истанбул шаҳрида яшаб келаётган Унсин Раҳимова бошлиқ жиноий гуруҳ Туркияда тайёрланган қалбаки чет эл валютасини Ўзбекистон Республикаси ҳудудига ғайриқонуний йўллар билан олиб кирган.

Унсин Раҳимова жами 80 минг АҚШ доллари миқдоридаги қалбаки хорижий валютасини курьер орқали Наманган вилоятида истиқомат қилувчи укаларига юборган ва улар турли жойларда асл банкнотларга алмаштириш билан шуғулланишган.

Тергов жараёнларда аниқланишича, Андижон вилоятида истиқомат қилувчи “ташувчи” турли молллар олиб келиш важи билан уч маротаба Туркияда бўлган: 2014 йилги сафар чоғида сохта $10,2 минг, ноябрь ойида $50 минг ва 2015 йилнинг апрелида $20 минг АҚШ долларини Ўзбекистон ҳудудига олиб кирган. Жиноий гуруҳ қалбаки пулларни кам-кам ҳажмда, лекин доимий равишда алмаштирган.

Ўтган йилнинг июнь ойида жиноий гуруҳ аъзоларидан бири ана шундай жиноят иши устида қўлга олингач, уларнинг барча кирдикорлар фош этилди.

“Суд жиноий гуруҳ аъзоларининг қилмишларига яраша жазо тайинланиб, ҳукм чиқарди”, деб ёзади “Ҳуқуқ” газетаси.