Анқарада юз берган теракт вақтида бомбани портлатганликда гумон қилинаётган кишининг шахси унинг бармоқ излари орқали аниқланди.

"17 февраль куни автомобилга ўрнатилган, 28 кишининг ҳаётига зомин бўлган бомбани Сурия фуқароси Солиҳ Нежар ҳаракатга келтирган", деб хабар қилади ТАСС агентлиги.

Маҳаллий нашрларнинг маълумотига кўра, Солиҳ Нежар Туркияга қочқинлар оқими билан бирга кирган.

Унинг бармоқ излари чегара хизматидан олинган, бу эса теракт содир бўлган жойда тана қисмлари топилган гумондорни аниқлашга имкон берди.

Портловчи восита беркитилган ва ҳарбий казарма атрофида портлаган машина икки ҳафта олдин Измир шаҳрида ижарага олинган.

Теракт натижаси яраланган 61 кишидан 30 нафарига касалхоналардан уйларига қайтишга рухсат берилган.

Ҳалок бўлганларнинг аксарияти Туркия қуролли кучлари вакилларидир, жумладан, зобитлар.

Туркиядаги портлашни ҳозирча ҳеч бир террористик гуруҳ ўз зиммасига олмаган. Лекин Туркия махсус хизматлари бу терактда Туркияда тақиқланган "Курдистон Ишчи партияси" қаноти бўлмиш Суриядаги курдлар гуруҳдан шубҳа қилмоқда.

Туркия бош вазири Анқарадаги теракт учун Сурия курдларини айблади