Ўзбекистонлик таэквондочилар 14-16 февраль кунлари Туркиянинг Анталия шаҳрида ўтказилган Turkish Open-2016 турнирида муваффақиятли иштирок этишди.

Чемпионатда бутун дунёдан келган 1523 нафар спортчи иштирок этишди. Турнирнинг биринчи кунида ўсмирлар ўртасидаги беллашувлар ўтказилди ва Ўзбекистон вакиллари бу баҳслар натижасида 5та медалга эга бўлишди.

Аёллар ўртасида 53 кг вазн тоифасида даянга чиққан Гўзал Норбобоева, 67 кг вазндаги Нигора Турсунқулова бронза медаллар билан тақдирланишди.

Эркаклар ўртасидаги баҳсларда 80 кг вазнда қатнашган Максим Рафалович финалда туркиялик Юнус Сарига имкониятни бой бериб, кумуш медал билан тақдирланди.
87 кг вазн тоифасида Ўзбекистон спорт шарафини ҳимоя қилган тажрибали спортчи, жаҳон вице-чемпиони Жасур Бойқўзиев ҳам кумуш медални қўлга киритди. У финал беллашувида Аҳмад Муҳаммадига ютқазиб қўйди.

74 кг вазнда иштирок этган Никита Рафалович барча рақибларини мағлубиятга учратиб, олтин медалга сазовор бўлди. У финал беллашувида Беркан Сунгуни мағлуб этди.

Ёшлар ўртасидаги мусобақалар бошлангач, 68 кг вазнда Светлана Осипова, 44 кг вазн тоифасидаги Мадинабону Маннопова финалга қадар мағлубиятсиз бориб, кумуш медалга эга бўлишди. Чарос Қаюмова эса бронза медали билан тақдирланди.

Шу тариқа, Ўзбекистон терма жамоаси турнирда 1 олтин, 4 кумуш ва 3 бронза, жами 8та медал олди.