Туркия ташқи ишлар вазирлиги Анқарадаги терактдан кейин БМТ Хавфсизлик кенгашига доимий аъзо давлатлар элчиларини чақиртирди, деб хабар бермоқда NTV телеканали.

Таъкидланишича, вазирликка АҚШ, Буюк Британия, Франция, Хитой ва Россия элчилари чақиртирилган.

Аввалроқ Туркия бош вазири Аҳмет Довудўғлу Анқарадаги терактни 1992 йилда туғилган Салоҳ Несар амалга оширганини маълум қилганди. Довудўғлунинг айтишича, худкуш Туркияда тақиқланган "Халқ мудофааси кучлари" аъзоси бўлган.

Телеканал маълумотларига кўра, террорчи чегарани ноқонуний ўтган ҳамда Курдистон ишчи партияси ва Сурия разведкаси билан алоқада бўлган бўлиши мумкин.

17 февралда Анқарада миналаштирилган автомобиль ҳарбий ётоқхона олдида портлатилди. Теракт оқибатида 28 киши ҳалок бўлган, 60 дан кўпроқ киши жароҳат олган.