Туркия жануби-шарқида аксилтеррор амалиёт ўтказиш учун етиб келган ҳарбийлар конвойи кетаётган йўлда портлаш юз берди. Рейтер агентлиги хабарига кўра, бу портлаш натижасида 7 киши ҳалок бўлган.

Haberturk манбаси хабарига кўра, Диёрбакир вилояти Лиджа шаҳри ҳудудида қўлда тайёрланган бомба портлатилган.

Бу ҳужум ким томонидан содир этилганига аниқлик киритилмаган.

Туркия ҳукумати 2015 йилнинг декабрида мамлакат жануби-шарқида комендантлик соати жорий этганди. Хусусан, Диёрбакир вилоятининг Сур шаҳрида, Ширнак вилоятининг Силоли ва Жизра шаҳарларида, шунингдек Мардин вилоятининг Даргечите ва Нусайбени шаҳарларида фавқулодда вазият амалда.

Туркия бош штаби маълумотига кўра, декабрь ойида бошланган аксилтеррор амалиётлар чоғида 850 нафарга яқин курд жангариси йўқ қилинган.

Бундан олдинроқ, Туркия бош вазири Аҳмад Довудўғли 17 февраль куни Анқарада содир этилган терактда Сурия курдларини, хусусан "Демократик иттифоқ" партиясига алоқадор мудофаа кучларини айблаганди. Сурия курдлари етакчиси эса, ўз навбатида, Анқарада юз берган терактда партиянинг алоқаси йўқлигини, бу портлашлар ИШИД жангарилари томонидан содир этилганини таъкидламоқда.