Венесуэла президенти Николас Мадуро нефть нархининг пасайиши мамлакат иқтисодиёти учун оғир зарба бўлганини маълум қилди. Бу ҳақда ТАСС ахборот агентлиги хабар берди.

Нефть Венесуэланинг асосий экспорт маҳсулоти ҳисобланади. Мадуронинг айтишича, охирги 6 йил ичида нефтдан келадиган фойда 4200 фоизга, яъни 42 баробарга камайиб кетган.

Мадуронинг таъкидлашича, 2010 йил январида мамлакат нефть савдосидан 3,31 млрд доллар олган, жорий йилнинг январида эса бу қиймат бор-йўғи 77 млн долларни ташкил қилган.

Нефть нархининг узоқ вақт паст қийматда сақланиб қолаётгани Венесуэлада ижтимоий-иқтисодий инқирозни кескинлаштириб юборди, бу эса мамлакат парламентига сайловларда муҳолифатнинг ғалаба қозонишига олиб келди.