Ўзбекистон Республикаси Парвозлар хавфсизлигини назорат қилиш давлат инспекцияси бошлиғининг 2016 йил 8 январдаги 67-Н-сонли буйруғига асосан, ҳаво кемасининг юриш, кўтарилиш ва қўниш вақтида электрон ва алоқа воситаларидан фойдаланиш, жумладан, ҳаво кемаси бортида фотосуратга ва видеотасвирга олиш тақиқланади, деб хабар беради “Даракчи” нашри.

Ўзбекистон Республикаси Маъмурий жавобгарлик тўғрисидаги кодексининг 117-моддасида “Ҳаво кемаси бортида туриб фотосуратга, кинога, видеога олиш, шунингдек радиоалоқа воситаларидан фойдаланиш қоидаларини бузиш — фото-киноплёнка ёки видеокассеталар мусодара қилиниб, энг кам иш ҳақининг уч бараваридан беш бараваригача миқдорда жарима солишга сабаб бўлади”, деб белгилаб қўйилган.

Самолёт бортида тақиқланади:

- Гиёҳванд моддаларни, тамаки маҳсулотларини (носвой ва бошқаларни ҳам) истеъмол қилиш, шунингдек, электрон сигареталардан фойдаланиш;
- ташувчи томонидан истеъмол қилиш учун таклиф қилинган белгиланган меъёрдан ташқари, шунингдек, бож олинмайдиган савдо дўконларидан сотиб олинган алкоголь маҳсулотларини истеъмол қилиш;
- учувчилар кабинасига кириш;
- ҳаво кемаси экипажи аъзоларининг хизмат вазифаларини бажаришларида уларга тўсқинлик қилиш ёки уларнинг ишларига аралашиш;
- ҳаво кемасининг мол-мулкини(пледлар, ёстиқлар, идиш товоқлар, ошхона жиҳозлари, электрон воситалар, қутқариш нимачалари ва бошқалар)ни олиб кетиш ва шикастлаш;
- жамоат тартибини бузиш ва заруратсиз атрофдагиларни безовта қилиш;
- ҳаво кемаси экипажи аъзоларининг тегишли кўрсатмаларисиз авария-қутқарув жиҳозларини ишлатиш;
- ҳаво кемаси экипажи аъзоларининг рухсати ёки кўрсатмаларисиз бошқа жойларга ўтириш.