15-20 февраль кунлари Андижон шаҳридаги Шўрбулоқ стадионида 14-15 ёшли ўсмирлар ўртасида футбол бўйича “Ҳоким Кубоги” турнири бўлиб ўтди.

Вилоят футбол федерацияси ҳамда Андижон шаҳар ҳокимлиги томонидан ташкил этилган ушбу мусобақада Олимпия заҳиралари коллежи жамоаси, Андижон шаҳар футболга ихтисослашган мактаб-интернати ва вилоят футболга ихтисослашган мактаб-интернатидан иккитадан жамоа, “Шаҳрихон-33” жамоаси, вилоят болалар ва ўсмирлар футбол мактаби, “Фарғона” жамоалари иштирок этдилар.

Муросасиз баҳсларга бой тарзда ўтган мусобақа якунларига кўра, Фарғона жамоаси учинчи, вилоят футболга ихтисослашган мактаб-интернати жамоаси иккинчи ўринни эгаллаган бўлса, ғолиблик Андижон шаҳар футболга ихтисослашган мактаб-интернати футболчиларига насиб этди.

Мусобақанинг тантанали ёпилиш маросимида сўз олган Андижон шаҳар ҳокими Улуғбек Солиев ҳамда вилоят футбол федерацияси биринчи вице-президенти Алишер Узоқов мусобақа иштирокчиларини кўрсатган ажойиб ўйинлари учун қутладилар. Турнирда ўзини кўрсатган турли номинация эгалари ва совриндорларга эсдалик совғалари топширилди. Мусобақанинг ғолиб жамоаси эса Кубок билан тақдирланди. 

-Бугун якунига етган беллашувлар вилоятимизда кўплаб иқтидорли футболчилар вояга етаётганини кўрсатиб берди - дейди вилоят футбол федерацияси биринчи вице-президенти Алишер Узоқов. – Ўйлайманки, улар орасидан турли терма жамоаларда юртимиз шарафини муносиб ҳимоя қиладиган ўйинчилар етишиб чиқади.

 

 

 

Элмурод ЭРМАТОВ, Андижон