Фижи ороллари яқинида бу ерни тарк этаётган "Уинстон" тўфони вақтида 5,1 дан 5,8 магнитудагача бўлган учта зилзила юз берди. Бу ҳақда АҚШ геологик хизмати маълум қилди.

Бу ерда 5,8 магнитудали энг кучли зилзила 20 февралда Тошкент вақти билан 20:51 да, Ндои оролидан 155 км узоқликда юз берди. Зилзила ўчоғи 579,4 км чуқурликда бўлган.

Бундан тахминан 20 дақиқа ўтиб, шу жойнинг ўзида 5,2 магнитудали яна битта зилзила қайд қилинди.

Бундан аввалроқ 5,1 магнитудали зилзила Тошкент вақти билан 19:58 да қайд қилинганди. Зилзила маркази Ндои оролидан 280 км узоқликда, ўчоғи 595,5 км чуқурликда бўлган.

Зилзила оқибатида вайроналар ва жабрланганлар ҳақида маълумот келиб тушмаган.

Аввалроқ Фижи оролига 5-хавф даражаси берилган "Уинстон" тўфони ёпирилгани маълум қилинганди. Расмий маълумотларига кўра, табиий офат оқибатида 1 киши ҳалок бўлган. Айни вақтда тўфон оролдан узоқлашмоқда. Ҳокимият маҳаллий аҳолини сув тошқинлари бўлиши мумкинлигидан огоҳлантирди.