Maserati компанияси бренд тарихидаги биринчи кроссоверни намойиш қилди. Levante деб ном олган кроссовер март ойида Женева автосалонида тақдим қилинади. Кроссовер Туриндаги Fiat заводида йиғилади. Янги автомобиль Европада баҳорда сотила бошланади, деб хабар бермоқда компания матбуот хизмати.

Автомобилнинг ташқи кўриниши Alfieri концепти услубида ишланган. Кроссовер Ghibli услубидаги ёруғлик-диодли фаралар ва хромланган катта радиатор панжараси олди. Янги автомобиль Maserati деталларидан йиғилади.

Maserati’нинг биринчи кроссовери техник кўрсаткичлари ҳозирча сир сақланмоқда. Норасмий маълумотларга кўра, машина учта мотор билан таклиф қилинади: 6 цилиндрли 335 ёки 424 от кучига эга бензинли, 8 цилиндрли 560 от кучига эга бензинли ва дастурий таъминот турига боғлиқ равишда 250, 275 ёки 340 от кучига эга дизелли.

Levante сотувга чиқарилгандан кейин унинг гибридли модификацияси ҳам пайдо бўлади. Бундай версия 2017 йилнинг иккинчи ярмида сотувга чиқади.

Аввалроқ компания Levante қурилиши мўлжалланган Jeep Grand Cherokee платформасидан воз кечишга қарор қилди. Хойнаҳой, янги автомобиль Quattroporte ва Ghibli моделлари архитектураси бўйича қурилган бўлса керак.